ആദ്യമൊന്നും ഫ്ലാറ്റ് ജീവിതവുമായി പൊരുത്തപ്പെടാന്‍ അവള്‍ക്ക് കഴിഞ്ഞിരുന്നില്ല. മണ്ണ് സ്പര്‍ശിക്കാത്ത വിണ്ണിലെ താമസം. ഒഴിവു സമയങ്ങളിലെ പുറം കാഴ്ചകളില്‍ വര്‍ണ്ണാഭമായ ആകാശവും പൂമരങ്ങളുടെ തലപ്പുകളും നോക്കിയിരിക്കാന്‍ അവള്‍ക്കിഷ്ടമാണ്. തൊഴിലിലേര്‍പ്പെടുമ്പോള്‍ എപ്പോഴും ഫ്രഷായിരിക്കാന്‍ പറ്റിയ ചുറ്റുപാടുകള്‍ ഫ്ലാറ്റില്‍ ധാരാളമുള്ളതിനാല്‍ യോജിച്ച് പോകുന്നു.
ഗുരുവായൂരില്‍ ഫ്ലാറ്റില്‍ ജീവിക്കാന്‍ ആരംഭിച്ചതിനുശേഷമാണ് അല്പമെങ്കിലും സ്വസ്ഥത കൈവന്നത്. നാനാതുറകളില്‍ പെട്ട ആളുകള്‍ ഇടതടവില്ലാതെ വന്നു പോകുന്ന സ്ഥലം. മനസ്സിലെ സങ്കടങ്ങള്‍ ഇറക്കിവെച്ച് ചെയ്തുപോയ സമസ്താപരാധങ്ങള്‍ക്കും മാപ്പിരന്ന് കാണിക്കയര്‍പ്പിച്ച് ജനസഹസ്രങ്ങള്‍ ശാന്തി തേടുന്നയിടം. ജീവിതം റീ ചാര്‍ജ്ജ് ചെയ്യപ്പെടുന്ന ഗുരുപവനപുരി. തിരക്കുള്ള ദിവസങ്ങളില്‍ ദര്‍ശനം സാധിക്കാറില്ലെങ്കിലും മനസ്സ് തിരുനടയിലെത്തി തൊഴുതു മടങ്ങാറുണ്ട്.
സുരേശനോടൊത്താണ് താമസം തുടങ്ങിയത്. കള്ളുകച്ചവടത്തിലെ ലാഭത്തിന്റെ ചെറിയ അംശങ്ങള്‍ സുഖസൌകര്യങ്ങള്‍ക്കായി ചെലവിടുന്നതില്‍ ആനന്ദം കണ്ടെത്തിയ മനുഷ്യന്‍. രണ്ടുമാസം കഴിഞ്ഞപ്പോഴേക്കും അവള്‍ക്ക് മടുപ്പനുഭവപ്പെട്ടു തുടങ്ങിയിരുന്നു. മദ്യപിച്ച് ബോധം കെട്ടുറങ്ങുന്ന അയാള്‍ക്കരികിലെ ശയനം ഭീതിദമായ ഭൂതകാല വാതായനങ്ങള്‍ തുറന്നിടുകയായി. മൂന്നു മാസത്തെ കരാറവസാനിപ്പിച്ചപ്പോള്‍ എന്തെന്നില്ലാത്ത ആശ്വാസമായിരുന്നു.
വഴിയോര വിശ്രമകേന്ദ്രത്തിലേക്ക് ഇന്നൊരാള്‍കൂടിയെത്തുന്നു. വ്യത്യസ്ത രുചിഭേദങ്ങള്‍ അനുഭവിക്കാന്‍ ഇറങ്ങിത്തിരിച്ചവന്‍. ഒരാഴ്ചത്തെ കൂടിക്കഴിയലിനുശേഷം താല്പര്യം നിലനില്‍ക്കുന്നുണ്ടെങ്കില്‍ മൂന്നുമാസത്തേക്ക് തുടരാം.
അവധിക്ക് നാട്ടിലെത്തിയ കുടുംബനാഥനെന്ന മട്ടിലാണ് അയാള്‍ വന്നു കയറിയത്. ഒന്നിനും ഒരു തിടുക്കവുമില്ലാതെ യാത്രാക്ഷീണമകറ്റാന്‍ കിടന്നുറങ്ങി. ചായയൂടെ സമയമായപ്പോള്‍ അവള്‍ വിളിച്ചുണര്‍ത്തി. ചായ മൊത്തിക്കുടിച്ചുകൊണ്ട് വീട്ടുകാരിയോടെന്നവണ്ണം അയാള്‍ വിശേഷങ്ങള്‍ തിരക്കിക്കൊണ്ടിരുന്നു. അമ്പലത്തില്‍ തിരക്കില്ലെങ്കില്‍ വൈകീട്ടൊരുമിച്ച് ദര്‍ശനത്തിനിറങ്ങണമെന്ന് നിഷ്കര്‍ഷിച്ചു. പെരുമാറ്റത്തിലെ സൌമ്യതയും പക്വതയും അറിയാതൊരു ആദരവു വളര്‍ത്താന്‍ പോന്നതായിരുന്നു.
ക്ഷേത്രദര്‍ശനം കഴിഞ്ഞ് സോപാനത്തില്‍ നിന്ന് അത്താഴവും കഴിഞ്ഞ് ഫ്ലാറ്റിലെക്ക് നടക്കുമ്പോള്‍ ദമ്പതികളല്ലെന്ന് പറയാന്‍ സാധിക്കില്ല. അറിയാത്തൊരടുപ്പത്തോടെ നിഴല്‍ പറ്റി അയാളോടൊപ്പം ചേര്‍ന്ന് നടക്കുകയാണവള്‍.
‘നിനക്കറിയോ ഇതൊരു പുണ്യ നഗരിയാണ്, പുണ്യ പാപങ്ങള്‍ ഇടകലര്‍ന്ന ജീവിതം പോലെ ഇവിടം പാപികളുടെയും ഇടത്താവളമാണ്. പിടിച്ചു പറിക്കാരും പോക്കറ്റടിക്കാരും കൊലപാതകികളും വ്യഭിചാരികളും ഇടകലര്‍ന്നു കഴിയുന്നു. ആര്‍ക്കും ആരെയും സംശയിക്കാതെ കഴിയാം. ഭഗവല്‍ ദര്‍ശനത്തിന്റെ മറവില്‍ നിസംശയം വാഴാം. വേറൊരു കൂട്ടര്‍ കൂടിയുണ്ട്.. പാപക്കറ പുരണ്ട വരുമാനത്തിലൊരു പങ്ക് ഭഗവാന് കാണിക്കയര്‍പ്പിച്ച് ചെയ്തു കൂട്ടുന്ന പാപകര്‍മ്മങ്ങള്‍ പുണ്യ പ്രവര്‍ത്തിയാകുമെന്ന് വിശ്വസിച്ച് വീണ്ടും അതാവര്‍ത്തിക്കാനുള്ള ഊര്‍ജ്ജം സംഭരിക്കാന്‍ വന്നു ചേരുന്നവര്‍..’ അയാളുടെ വാക്ധോരണി കേട്ട് അവള്‍ തലകുലുക്കുക മാത്രം ചെയ്തു. അവള്‍ക്ക് യോജിക്കാന്‍ കഴിയാത്ത ഒന്നുണ്ടായിരുന്നു. ദേവസ്വത്തിനെത്രയോ വരുമാനമുണ്ട്.. ഓടയിലെ കാര്‍വര്‍ണ്ണമായ മലിന ജലമൊന്ന് നീക്കി ഗുരുവായൂര്‍ ഒരു ക്ലീന്‍ സിറ്റിയാക്കാന്‍ ആരും എന്തേ മുന്‍ കയ്യെടുക്കാത്തത്.. ശബരിമല സീസണിലെ ദുര്‍ഗന്ധമനുഭവിക്കാത്തവര്‍ ചുരുക്കമായിരിക്കും. ദര്‍ശനത്തിനെത്തുന്ന പതിനായിരങ്ങള്‍ക്ക് അല്പ വിശ്രമത്തിനൊരിടം സൌജന്യമായി നല്‍കിക്കൂടെ.
ഓരോ ദിവസം കഴിയുംതോറും അയാളെ കൂടുതല്‍ ഇഷടപ്പെട്ടു തുടങ്ങുകയായിരുന്നു. ഇത്രമാത്രം മൃദുലത ഒരിടത്തുനിന്നും അനുഭവിച്ചിട്ടില്ല. വാക്കിലും പ്രവര്‍ത്തിയിലും വേഴ്ചയിലും പക്വതയാര്‍ന്ന സമീപനം. ഒരു പനിനീര്‍പൂവ് വിരിയുന്നതുപോലെ സുരഭിലമായൊരു സ്ഥായീഭാവത്തിലവസാനിക്കുന്നു.
ഒരിക്കല്‍ പോലും ആരോടും വ്യക്തിപരമായ കാര്യങ്ങള്‍ ആരാഞ്ഞിട്ടില്ല. ഇദ്ദേഹത്തിനൊരു ഭാര്യയുണ്ടെങ്കില്‍ അവര്‍ ഭാഗ്യവതിയാണോ.. അഭിസാരികകളുടെയില്‍ അന്തിയുറങ്ങുന്നത് അയോഗ്യതയല്ലേ..
താമസം തുടങ്ങിയിട്ട് ഒരു മാസം കഴിഞ്ഞപ്പോഴേക്കും കാലങ്ങളായി ഒരു കൂരക്ക് കീഴില്‍ ജീവിച്ചുവന്നവരേക്കാള്‍ അടുപ്പത്തിലായി. തന്നെക്കൊണ്ട് സാധ്യമായതെല്ലാം നല്‍കി അവള്‍ അയാളെ ആനന്ദത്തിലാഴ്ത്തി.
ഇടപഴകിയ പലരും പോയ കാലം ചിക്കി ചികയാറുണ്ട്. നൈമിഷികമായ കൂടിച്ചേരലുകള്‍ക്കുപരിയായൊന്നും കാണാന്‍ ശ്രമിക്കാത്തവര്‍. മറ്റുള്ളവരുടെ യാതനകളില്‍ പല്ലുകളാഴ്ത്തി നൊട്ടി നുണയാന്‍ ആഗ്രഹിക്കുന്നവര്‍. അവര്‍ക്കുമുന്നിലൊന്നും തുറക്കാത്ത വാതിലുകള്‍ അവള്‍ പോലുമറിയാതെ ഒന്നൊന്നായി തുറന്നുകൊണ്ടിരുന്നു.
പൂത്തുലഞ്ഞ വസന്ത നിനവുകളുമായി വിവാഹിതയായ പെണ്‍കുട്ടി. ദാമ്പത്യത്തിന്റെ ജീവനാഡി നിഷേധിക്കപ്പെട്ട ഏഴു വര്‍ഷങ്ങള്‍. ഭര്‍ത്താവിന്റെ വിമുഖതയുടെ രഹസ്യമറിയാന്‍ കഴിഞ്ഞിരുന്നില്ലെങ്കില്‍ അവിടെ ആയുസ്സൊടുക്കുവാന്‍ അവള്‍ തയ്യാറായിരുന്നു. വഴി വിട്ട സ്വവര്‍ഗ്ഗാനുരാഗ കാഴ്ചകള്‍ ഉള്‍ക്കാഴ്ചയായി. തല്ലിക്കൊഴിച്ചൊരു ജീവിതത്തിന്റെ പക അവളില്‍ നാമ്പിട്ടു. ഭര്‍ത്താവിന്റെ സുമുഖരായ അനുരാഗികളെ ഒന്നിച്ചും ഒറ്റക്കും അവര്‍ സ്വീകരിച്ചു. എല്ലാം പൊട്ടിച്ചെറിഞ്ഞപ്പോള്‍ കൂട്ടം തെറ്റിയ മറ്റൊരു ജീവിതത്തിന് തുടക്കവുമായി.
ദിവസങ്ങള്‍ക്ക് ചിറകുകള്‍ മുളച്ചിരിക്കുന്നു. അയാള്‍ക്ക് പോകാന്‍ സമയമായി. ഒരു പാവം ഗ്രാമീണ സ്ത്രീയാണ് അയാളുടെ ഭാര്യ. എഴുന്നേല്‍ക്കുമ്പോള്‍ പാദം തൊട്ടു വന്ദിച്ച് ഭര്‍ത്താവിനെ ദൈവത്തെപ്പോലെ കാണുന്ന നിഷ്കളങ്ക. എല്ലാം അരുതാത്തതാണവള്‍ക്ക് .. അയാളും ഒന്നും നിര്‍ബന്ധിക്കാറില്ല. ഇടക്കുള്ള യാത്രകള്‍ക്കൊരു പ്രചോദനം വേണമല്ലോ..
ഇനിയും വരാമെന്ന് യാത്രാമൊഴി കേള്‍ക്കുമ്പോള്‍ അവളുടെ ഉള്‍ത്തടം വേദനകൊണ്ട് വിങ്ങുന്നുണ്ടായിരുന്നു. ജീവിതത്തിലൊരിക്കലും ഉണ്ടായിട്ടില്ലാത്ത അനുഭവം. സ്നേഹം കോണ്ട് കീഴ്പ്പെടുത്തിയ ഒരാള്‍..
മൂന്ന് മാസത്തെ വേതനമായി അയാള്‍ നല്‍കിയ ചെക്ക് മധുരിക്കുന്നൊരോര്‍മ്മയായി അവളുടെ കയ്യിലവശേഷിച്ചു.
പിറ്റേന്ന് ഫ്ലാറ്റിന്റെ വാടക നല്‍കുന്നതിനു വേണ്ടി ചെക്ക് ബേങ്കില്‍ നല്‍കിയപ്പോളറിഞ്ഞ സത്യം കുറച്ച് കൂടി ഖേദകരമായിരുന്നു. വണ്ടിച്ചെക്ക് നല്‍കി ഓര്‍മ്മകളെ കുഴിച്ച് മൂടാന്‍ അയാള്‍ പ്രാപ്തനായിരുന്നുവത്രെ!
super! സത്യസന്ധമായ ഒരു കഥയുടെ ലാളിത്യമാര്‍ന്ന വിവരണം .വക്കീല്‍ കഥകള്‍ക്ക് ഒരു മുഖ മുദ്ര തന്നെ എന്ന് നിസ്സംശയം പറയാം.thanx
മറുപടിഇല്ലാതാക്കൂkathakku nalla ozhukkum mizhivmundu.samvedhanathinu kooduthal theeshnathayundu
മറുപടിഇല്ലാതാക്കൂവളരെ ഇഷ്ടമായി !നല്ല പ്രമേയം
മറുപടിഇല്ലാതാക്കൂഒതുക്കത്തോടെ,ലളിതമായി പറഞ്ഞിരിക്കുന്നു ..........
അഭിനന്ദനങ്ങള് !
നല്ല കഥ. ലളിതമായി ഒഴുക്കോടെ അവതരിപ്പിച്ചു. അയാളില്‍ നിന്നു ഒരിക്കലും പ്രതീക്ഷിക്കാത്ത ഒന്ന് കഥയുടെ അവസാനം സംഭവിച്ചപ്പോള്‍ നന്നായി ശോഭിച്ചു.
മറുപടിഇല്ലാതാക്കൂലേഖനത്തിലേത് പോലെ സാഹചര്യങ്ങളും സംഭവങ്ങളും പറഞ്ഞത് ഉചിതവുമായി, ചുറ്റുപാടുകളെക്കുറിച്ചുള്ള ധാരണ വേണ്ടുവോളം ലഭിക്കുകയും ചെയ്തു.
ആശംസകള്‍.
An effective thread, and good narration . you opened the faith of a girl and the face of idiets.
മറുപടിഇല്ലാതാക്കൂ